Azərbaycanın Niderlanddakı səfiri bu ölkənin Xarici İşlər Nazirliyinə çağırılıb. Səfirimizin XİN-ə çağırılması “Azərbaycanın Beynəlxalq Ədalət Məhkəməsinin Laçın yolundakı etiraza ilə bağlı qərarına əməl etməməsi” ilə əlaqələndirilib.
Mövzu ilə bağlı Globalinfo.az-a danışan politoloq Yeganə Hacıyeva deyib ki, əvvəlcə həmin qurumun qərarvermə mexanizminə baxmaq lazımdır:
“Beynəlxalq Ədalət Məhkəməsi BMT-nin təsisatıdır. Niderlandın ədliyyə sistemi Beynəlxalq Cinayət Məhkəməsi və digər instansiyalar ilə bağlı kimlərinsə saxlanılmasında iştirak edə bilər. Lakin hər hansı ölkədən verilən bir qərarı icra etməsini tələb edə bilməz. Niderlandın belə bir məsələni gündəmə gətirməsi bu ölkənin də erməni lobbisinin yuvasına çevrilməsi ilə əlaqədardır.
Laçın dəhlizi ilə bağlı məsələ 10 Noyabr bəyanatında öz əksini tapıb. Belə ki, Laçın dəhlizinin bitdiyi yerdən Zəngəzur başlamalı idi. Zəngəzur dəhlizi açılmadan Laçın dəhlizi ilə bağlı nəsə demək doğru deyil”.
Politoloq Elxan Şahinoğlu isə bildirib ki, Ermənistan 30 ilə yaxın müddətdə BMT-nin 4 qətnaməsini yerinə yetirməyəndə Niderlandı və digərlərini “qərarlar niyə yerinə yetirilmir” sualı maraqlandırmırdı:
“Erməni saytının yaydığı xəbərin doğru və ya yalan olduğunu söyləmək üçün Azərbaycan Xarici İşlər Nazirliyinin məlumatına ehtiyac var. Əgər bu fakt doğrudursa, Laçın yolundakı etiraza görə ilk dəfədir ki, xarici ölkələrdən birindəki səfirimiz həmin dövlətin Xarici İşlər Nazirliyinə çağırılıb. Bu, Azərbaycana qarşı artan təzyiqin yeni formasıdır. Başqaları da bu üsuldan istifadə edə bilərlər. Avropa ölkələrinin bir qismində “Laçın yolu açıqdır” arqumentimizi eşitmək və qəbul etmək istəmirlər. Səfirlərimiz çalışdıqları ölkələrdə “Azərbaycanın öz ərazisində – Laçın yolunda sərhəd-keçid məntəqəsi yaratması suveren haqqıdır” təbliğatını gücləndirməlidirlər. Çünki bir gün sərhəd-keçid məntəqəsi yaradılanda həmin ölkələr buna hazır olmalıdırlar“.
(Turan Rzayev)
Poliqon.info
Digərxəbərlər
Populyar xəbərlər
