Naxçıvan Ali Məclisinin deputatları Strasburqa gediblər - Foto

"Report"un Naxçıvan bürosu xəbər verir ki, martın 20-dən 24-dək bu şəhərdə Avropa Şurası Yerli və Regional Hakimiyyətlər Konqresinin 44-cü sessiyası keçirilib.

Konqresin Regionlar Palatasının iclasında çıxış edən A.Cəlilzadə ermənilərin Qarabağda Azərbaycana qarşı törətdikləri ekosid və təbii sərvətlərin qanunsuz talanmasına etiraz olaraq azərbaycanlı ekofəalların keçirdikləri aksiya barədə məlumat verib. O, həmçinin işğaldan azad olunan Qarabağ və Şərqi Zəngəzur iqtisadi rayonlarında quruculuq, “Böyük qayıdış” proqramının həyata keçirilməsindən də geniş bəhs edib.

Deputat Anar İbrahimov sessiyada "Demokratiyanın aşağı səviyyədə yeridilməsi: Avropa Şurasının gələcəyi və Konqresin oradakı rolu. 16-17 may 2023-cü il tarixlərində İslandiyanın Reykyavik şəhərində Avropa Şurası dövlət və hökumət başçılarının 4-cü zirvə görüşünə Konqresin töhfəsi" adlı sənədin müzakirəsinə qatılıb. O, Avropa Şurası məkanında təhdidlər, xüsusən də aqressiv separatizm və onun təhlükələri barədə danışıb.

Demokratik cəmiyyətimizdə hansı təhlükələrin olduğunu diqqətə çatdıran A.İbrahimov onu da əlavə edib ki, aqressiv separatizm cəmiyyətimiz üçün ciddi təhlükədir və bununla qəti şəkildə mübarizə aparılmalıdır. O diqqətə çatdırıb ki, Avropa Şurası bəzən fundamental dəyərləri və prinsipləri müdafiə etməkdə qeyri-ardıcıllıq nümayiş etdirir: “Lakin biz insan hüquqlarının müdafiəsinə və xalqların suverenliyinin qorunmasına sadiqliyimizi gücləndirmək üçün birlikdə çalışmalıyıq. İllər ərzində Avropa Şurasında Azərbaycan ərazilərinin Ermənistan tərəfindən işğal altında saxlanmasına məhəl qoyulmayıb. Bizim dəyərlərimiz və yanaşmalarımız universal deyildi və indi də bununla bağlı bir çox problemimiz var".

A.İbrahimov vurğulayıb ki, demokratik cəmiyyəti daxili və ya xarici bütün təhlükələrə qarşı qorumaq üçün həmrəylik və qətiyyət göstərməliyik: "Daha ədalətli və daha demokratik gələcək qurmaq üçün birlikdə çalışmalıyıq".

Poliqon.info