Ərdoğanın seçkiləri uduzması Rusiya üçün hansı risklər yaradır?...

Müxalifət namizədi Kamal Kılıçdaroğlu Türkiyədə prezident seçkilərində qalib gəlsə, Ankara çox güman ki, Rusiya ilə əvvəlki ortaq iqtisadi layihələri saxlayacaq, lakin Moskvadan alınan S-400 hava hücumundan müdafiə sistemlərindən qurtula bilər.

Poliqon xəbər verir ki, bunu politoloq İqbal Durre News.ru portalına açıqlamasında bildirib. Politoloq Türkiyənin hazırkı lideri Rəcəb Ərdoğanın əsas rəqibinin daha çox Qərbyönümlü olduğunu, lakin Rusiya ilə münasibətləri kəskin şəkildə gərginləşdirməyə risk etməyəcəyini vurğulayıb.

“Kılıçdaroğlu daha çox qərbpərəstdir, lakin o, Rusiya ilə münasibətləri kəskin şəkildə mənfi istiqamətdə dəyişmək istəməz, çünki Türkiyənin istənilən hökuməti üçün Rusiya ilə iqtisadi əlaqələr çox önəmlidir. Köhnə layihələr, qaz kəmərləri, Akkuyu AES kimi iri layihələr qorunub saxlanılacaq, lakin yeni layihələrin həyata keçirilməsi çətin ki, baş tutsun. Məsələn, Türkiyənin qaz habına çevrilməsi çətin ki, baş tutsun. Həmçinin Kılıçdaroğlu Rusiyanın S-400 hava hücumundan müdafiə sistemlərindən də imtina edə bilər”, deyə Durre bildirib.

Ekspert əlavə edib ki, Kılıçdaroğlu Türkiyəyə rəhbərlik edəcəyi təqdirdə həm Qərb, həm də Rusiya ilə münasibətlərdə balansı qorumağa çalışacaq. Durrenin fikrincə, Kılıçdaroğlu kürd yönümlü Xalqların Demokratik Partiyasının dəstəyi ilə Ərdoğanı məğlub edə bilər. Ekspert onu da qeyd edib ki, HDP hazırkı dövlət başçısının əsas rəqibini 12%-ə qədər əlavə səslə təmin edəcək. Poliqtoloq bildirib ki, çox güman ki, kürdlərin simpatiyası həlledici olacaq.

Qeyd edək ki, Türkiyədə prezident və parlament seçkiləri mayın 14-də keçiriləcək.

Poliqon.info