Müasir Müsavat Partiyasının Soyqırım bəyanatı

Müasir Müsavat Partiyası 31 Mart - Azərbaycanlıların Soyqırımı Günü ilə bağlı bəyanat verib.

Bəyanatda deyilir:

1918-ci ilin 30 mart - 3 aprel tarixlərində Bakı şəhərində, eləcə də Qarabağ, Naxçıvan, Şamaxı, Quba, Xaçmaz, Lənkəran, Salyan, Zəngəzur və digər ərazilərdə Bakı Soveti qoşunları və daşnak erməni silahlı dəstələri 30 mindən çox azərbaycanlını qətlə yetirdi. 10 minlərlə insanı isə öz torpaqlarından qovdular.

Erməni cəlladları uşaq, qoca, qadın demədən dinc əhalini kütləvi surətdə qətlə yetirdi, on minlərlə azərbaycanlı ilə yanaşı, minlərlə ləzgi, yəhudi, rus, avar və talış milliyyətinə mənsub insanları qılıncdan, süngüdən keçirərək diri-diri yandırdı. Eyni zamanda milli memarlıq incilərini, məktəbləri, xəstəxanaları, məscid və mədəni abidələri dağıtdılar.

Ötən illər ərzində aparılmış araşdırmalar sayəsində ermənilərin azərbaycanlılara qarşı törətdikləri cinayətlərin bir çox yeni faktlar və sənədlərlə üzə çıxdı. Habelə Quba şəhərində kütləvi məzarlıq aşkarlandı. Üzə çıxmış tarixi faktlar 1918-ci ilin mart-aprel aylarında və sonrakı dövrlərdə erməni millətçilərinin həyata keçirdikləri qanlı aksiyaların coğrafiyasının daha geniş və faciə qurbanlarının sayının qat-qat çox olduğunu sübuta yetirir. Bu faktların dünya ictimaiyyətinə çatdırılması üçün hər kəs öz öhdəsinə düşəni etməlidir.

Poliqon.info