Almaniyanın Ümum Daxili Məhsulu (ÜDM) ardıcıl ikinci rübdür ki, azalır və bu, texniki tənəzzülü göstərir...
Poliqon Almaniya Federal Statistika İdarəsinə istinadən xəbər verir ki, Almaniyanın ÜDM-i bu ilin birinci rübündə əvvəlki rüblə müqayisədə 0,3% azalıb. Ötən ilin dördüncü rübündə isə ÜDM 0,5% azalmışdı.
Departamentin mütəxəssisləri əhalinin alıcılıq qabiliyyətində yüksək inflyasiya və enerji daşıyıcılarının qiymətinin artması ilə əlaqədar azalma olduğunu qeyd edirlər. Beləliklə, qeyd olunur ki, əhali ərzaq, geyim və ayaqqabılara qənaət etməyə başlayıblar.
Departament, həmçinin Almaniyada inflyasiyanın hələ də kifayət qədər yüksək səviyyədə olduğunu və aprel ayında illik ifadədə 7,2% təşkil etdiyini bildirib.
Bundan əvvəl Beynəlxalq Valyuta Fondu Almaniya iqtisadiyyatının yaxın bir neçə il üçün inkişafı ilə bağlı məyusedici proqnoz vermişdi. Analitiklərin fikrincə, bu il Almaniyada durğunluq müşahidə olunur və 2024-2026-cı illərdə ÜDM artımı təxminən 1-2% təşkil edəcək. Beynəlxalq Valyuta Fondunun hesabatında bildirilir ki, alman şirkətləri hazırda enerji daşıyıcılarının qiymətlərinin artması ilə problemlər yaşayır və gələcəkdə yüksək ixtisaslı mütəxəssis çatışmazlığı və demoqrafik vəziyyət iqtisadiyyatın inkişafına mənfi təsir göstərəcək.
Poliqon.info