Cənubi Koreyanın Müdafiə Nazirliyi Pxenyana xəbərdarlıq edib ki, Şimali Koreya nüvə silahından istifadə etməyə cəhd edərsə, onun rejiminin sonu olacaq...
Poliqon xəbər verir ki, bu barədə "Yonhap" məlumat yayıb.
"Şimali Koreya silahdan istifadə etməyə çalışarsa, Cənubi Koreya və ABŞ ittifaqından dərhal, güclü və qətiyyətli cavab alacaq və rejim öz sonu ilə üz-üzə qalacaq", deyə Müdafiə Nazirliyinin sözçüsü Con Ha-kyu Pxenyanın nüvə əks-hücumunun imitasiyası ilə keçirdiyi hərbi təlimlər barədə xəbərləri şərh edərkən bildirib.
Con Ha-kyu qeyd edib ki, Şimali Koreyanın davam edən təxribatları yalnız Cənubi Koreyanın hərbi potensialını və ABŞ-ın gücləndirilmiş çəkindirmə qabiliyyətini, eləcə də Yaponiya ilə təhlükəsizlik sahəsində üçtərəfli əməkdaşlığı gücləndirəcək.
Genişləndirilmiş çəkindirmə dövlətlərin öz müttəfiqlərini qorumaq üçün nüvə də daxil olmaqla hərbi imkanlarının tam spektrindən istifadə etmək öhdəliyi deməkdir.
Cənubi Koreyanın Birləşmiş Qərargah Rəisləri Komitəsi (JCS) Seul və Vaşinqton arasında davam edən hərbi təlimlər fonunda Pxenyanın son raket sınağını "güc nümayişi" adlandırıb.
JCS sözçüsü Li Sonq-junq Şimali Koreyanın nüvə hücumu ehtimalı ilə bağlı bəyanatını "şişirdilmiş" kimi qiymətləndirib və əmin edib ki, Cənubi Koreya ordusu Şimali Koreyanın ballistik raketlərini aşkar edib vurmağa hazırdır.
Şimali Koreyanın Super Böyük Ballistik Raket Sistemi Seul və müttəfiqləri tərəfindən Cənubi Koreyanın istənilən yerində hədəfi vura bilən qısa mənzilli raket kimi təsnif edilir. Pxenyan belə bir silahın taktiki nüvə başlığı ilə təchiz oluna biləcəyini iddia edir.
Poliqon.info