Hindistan və Rusiya Arktikada birgə layihələr həyata keçirəcəklər

Hindistan elmi əhəmiyyətinə görə Beynəlxalq Kosmik Stansiya (BKS) ilə müqayisə oluna bilən Arktikada Rusiya ilə birgə layihəni müzakirə edir.

Poliqon xəbər verir ki, bu barədə TASS Agentliyinə Rusiya Arktika və Antarktika Tədqiqat İnstitutunun (AARI) direktoru Aleksandr Makarov Hindistanın Qütb və Okean Tədqiqatları Milli Mərkəzinin nümayəndələri ilə danışıqların aparıldığı Vasko da Qama (Qoa) şəhərinə səfərindən sonra məlumat verib.

“Rusiya hazırda Arktikada güclü tədqiqat layihəsini - Şimal Qütbünə üzən ekspedisiyanı həyata keçirir. Alimlərimiz yüksək enliklərdə elmi işlərin aparılması üçün ən müasir avadanlıq və texnologiyaya malik olan unikal gəminin - buzadavamlı platformanın dəstəyi ilə işləyirlər. Biz hindistanlı həmkarlarımızı tədqiqata qoşulmağa dəvət etdik və onlar çox maraqlandılar”, deyə Makarov bildirib.

Makarovun sözlərinə görə, yaxın vaxtlarda Hindistanın elmi müəssisələrinin nümayəndələri ilə bir sıra işgüzar görüşlər başlayacaq, bu görüşlərdə Arktika regionunun təbii mühitinin öyrənilməsi üçün mümkün istiqamətlər və mövzular müzakirə olunacaq.

“BKS və ya Böyük Adron Kollayderi kimi ən böyük layihələrə baxsanız, onların hamısı beynəlxalq layihələrdir. Oxşar təcrübə bizim Hindistandan olan həmkarlarımızın iştirakı ilə Arktikada həyata keçirilə bilər”, deyə AARİ-nin direktoru vurğulayıb.

Makarov xatırladıb ki, Antarktidada Rusiya və Hindistan kifayət qədər uzun müddətdir ki, genişləndirilə bilən müvafiq saziş çərçivəsində əməkdaşlıq edir və bir-birlərinə kömək edirlər. Onun sözlərinə görə, hind alimləri uzun müddətdir Arktikada tədqiqatlar aparırlar, lakin onları bu regionda Rusiya ilə birgə işləmək imkanı nəzərəçarpacaq dərəcədə cəlb edib.

“Hindistanlı alimlərin Arktikaya marağı son vaxtlar xeyli artıb, çünki yüksək enliklərdə iqlim dəyişikliyi bütün planetə təsir edir. Arktikada atmosfer sirkulyasiyasındakı dəyişikliklər Hindistan musson sisteminə təsir göstərir və kənd təsərrüfatı üçün əhəmiyyətli nəticələrə səbəb olur. Biz mussonların mövsümiliyi və intensivliyinin dəyişməsini, Hindistan vətəndaşlarının həyatına təsir edən istilik dalğalarının meydana çıxmasını qeyd edirik”, deyə alim izah edib.

AARİ rəhbəri vurğulayıb ki, Arktikada Rusiya-Hindistan əməkdaşlığı uzunmüddətli perspektivə malik ola bilər.

“Təbii mühiti daim öyrənmək və baş verən dəyişiklikləri təhlil etmək lazımdır. Yeni elmi biliklər gələcək iqlim dəyişikliklərinə vaxtında uyğunlaşmağa və mümkün zərərləri minimuma endirməyə kömək edəcək. Bu, dünyanın bütün alimləri üçün vacib və faydalıdır”, deyə Makarov fikrini yekunlaşdırıb.

Xatırladaq ki, Arktika və Antarktika Tədqiqat İnstitutu Yerin qütb bölgələrinin öyrənilməsi üzrə dünyanın aparıcı elmi mərkəzidir. 100 ildən artıqdır ki, AARİ Arktika regionunun Rusiya hissəsində və Antarktidada federal məqsədli proqramlar və Rusiya hökumətinin qaydaları çərçivəsində Roshidrometin, nazirliklərin və idarələrin sifarişləri əsasında fundamental və tətbiqi tədqiqat və inkişaf işləri aparır.

Həmçinin Qütb və Okean Tədqiqatları Milli Mərkəzi Vasko da Qama (Qoa) şəhərində yerləşən Yer Elmləri Nazirliyinin nəzdində Hindistanın muxtar tədqiqat müəssisəsidir. Bu qurum Hindistanınn Antarktika proqramının idarə edilməsinə cavabdehdir və Hindistanın Antarktika tədqiqat stansiyalarına xidmət göstərir.

Poliqon.info