Fələstin dövləti yaradılarsa, HƏMAS hərbi qanadını ləğv edəcək...
Fələstinin HƏMAS hərəkatı Fələstinin dövlətçiliyi təmin olunarsa, İsraillə beş il və ya daha çox müddətə uzunmüddətli atəşkəsə razılaşmağa və hərbi qanadını ləğv etməyə hazırdır.
Poliqon xəbər verir ki, bu barədə Associated Press Agentliyi HƏMAS-ın yüksək rütbəli rəsmisi Xəlil əl-Hayyaya istinadən məlumat yayıb.
“HƏMAS hərəkatı İsraillə beş il və ya daha çox müddətə atəşkəsə razılaşmağa hazırdır və 1967-ci ildən əvvəl mövcud sərhədlərdə müstəqil Fələstin Dövləti yaradılarsa, təşkilst silahlarını yerə qoyub siyasi partiyaya çevriləcək”, deyə mesajda bildirilir.
AP qeyd edir ki, hərəkatın yüksək rütbəli rəsmisinin müvafiq bəyanatı “İsrailin məhv edilməsinə rəsmən sadiq olan silahlı qruplaşmanın əhəmiyyətli güzəşti” ola bilər. Eyni zamanda, nəşr Xəlil əl-Həyyanın təklif etdiyi variantı çətin reallaşan bir proses hesab edir, çünki İsrail HƏMAS-ı darmadağın edəcəyinə söz verib.
Qeyd edək ki, Əl-Həyya bundan əvvəl bəyan etmişdi ki, İsrail Müdafiə Qüvvələri (IDF) Qəzza zolağında Fələstinin HƏMAS hərəkatının hərbi potensialının 20%-dən çoxunu məhv edib.
Poliqon.info