Fələstin prezidenti Ağ Evin təklifini rədd edib...

Fələstin prezidenti Mahmud Abbas ABŞ prezidenti Co Bayden administrasiyasının Fələstinin Birləşmiş Millətlər Təşkilatına (BMT) tamhüquqlu üzv qəbul edilməsi ilə bağlı səsvermənin təxirə salınması ilə bağlı təkliflərini rədd edib.

Poliqon xəbər verir ki, bu barədə aprelin 18-də “Axios” portalı öz mənbələrinə istinadən məlumat yayıb.

Xəbərdə qeyd edilir ki, son iki həftə ərzində aparılmış uzun danışıqlar zamanı ABŞ administrasiyası Abbas və onun müşavirlərini BMT-yə üzv olmaqdan imtina etməyə inandırmağa çalışıb. “Axios” yazır ki, ABŞ Dövlət katibi Entoni Blinken telefon danışığı zamanı bu təkliflə şəxsən Fələstin prezidentinə müraciət edib.

Bayden administrasiyası, Abbasın Ağ Evdə ABŞ prezidenti ilə görüşə dəvət olunacağı təqdirdə, onun təklifini dayandırmağı təklif edib. Lakin Fələstin lideri belə bir təklifdən imtina edib.

İsrail mənbəsindən verilən məlumata görə, Əlcəzair, Qayana, Çin, Malta, Mozambik, Rusiya, Sloveniya və Syerra Leone Fələstinin BMT-yə tam hüquqlu üzvlük istəyini dəstəkləməyə hazırdır. Böyük Britaniyanın səsvermədə bitərəf qalacağı gözlənilir.

Məlumata görə, Vaşinqton və Təl-Əviv Fransa, İsveçrə, Ekvador, Cənubi Koreya və Yaponiyanı bu təklifin əleyhinə səs verməyə və ya səsvermədə bitərəf qalmağa inandırmağa çalışır. Mənbələr bildiriblər ki, cəhdlər uğursuz olarsa, ABŞ qətnaməyə veto qoya bilər.

Qeyd edək ki, Fələstin hazırda BMT-də daimi müşahidəçi statusuna malikdir. 2011-ci ildə ölkə artıq bu beynəlxalq təşkilata tamhüquqlu üzv olmağa çalışsa da, son nəticədə müşahidəçi statusu ilə məhdudlaşaraq qərardan imtina edib.

BMT-yə yeni üzvün qəbulu proseduru Təhlükəsizlik Şurasının 15 üzvündən doqquzunun səsini tələb edir, bir şərtlə ki, daimi üzvlərdən heç biri (Böyük Britaniya, Çin, Rusiya, ABŞ və Fransa) onun əleyhinə səs verməsin. Bundan sonra məsələ Baş Assambleyaya təqdim olunur. Burada da ərizə səslərin üçdə ikisini almalıdır.

Poliqon.info