Bloomberg: Tramp yeni gömrük rüsumları ilə proteksionist siyasətini bərpa etməyə çalışır...

Poliqon xəbər verir ki, Bloomberg Agentliyinin məlumatına görə, ABŞ prezidenti Donald Trump administrasiyası onlarla ölkədən idxal olunan məhsullara qarşı yeni gömrük rüsumlarının tətbiqini nəzərdə tutan genişmiqyaslı təşəbbüslə çıxış edib. Nəşrin qiymətləndirməsinə görə, bu addım Trampın uzun müddətdir müdafiə etdiyi proteksionist ticarət siyasətinin yenidən qurulmasına yönəlmiş ən iri təşəbbüslərdən biridir.

Məlumata əsasən, ABŞ 60 ölkədən idxal edilən məhsullara minimum 10 faiz həcmində əlavə tarif tətbiq etməyi planlaşdırır. Bu qərar daha əvvəl ölkənin ali məhkəmə instansiyası tərəfindən ləğv edilmiş bəzi gömrük məhdudiyyətlərinin əvəzlənməsi məqsədi daşıyır.

ABŞ Ticarət Nümayəndəliyinin Ofisinin apardığı araşdırmalara görə, yeni tariflər əsasən məcburi əməkdən istifadə edilməklə istehsal olunduğu ehtimal edilən məhsulların idxalına qarşı yönəldilib. Təklifə əsasən, Kanada, Meksika, Avropa İttifaqı, Tayvan və Birləşmiş Krallıq da daxil olmaqla bir sıra ölkələrdən idxal edilən mallara 10 faiz həcmində rüsum tətbiq olunacaq.

Digər böyük iqtisadiyyatlara münasibətdə isə daha yüksək tarif nəzərdə tutulur. Belə ki, Çin, Hindistan, Yaponiya, Cənubi Koreya, Braziliya və İsveçrə kimi ölkələrdən idxal olunan məhsullara 12,5 faiz həcmində gömrük rüsumu tətbiq edilməsi təklif olunur.

ABŞ Ticarət Nümayəndəliyinin Ofisi bildirib ki, daha aşağı tarif dərəcəsi məcburi əməyin istifadəsi ilə istehsal olunan məhsulların idxalını qadağan edən və ya belə qadağaları tətbiq etməyi öhdəsinə götürən ölkələrə şamil ediləcək. Bunun əksinə olaraq, bu sahədə effektiv nəzarət mexanizmi yaratmayan və ya qadağaların icrasını təmin etməyən ölkələr daha yüksək tariflərlə üzləşəcəklər.

Agentliyin məlumatına görə, təklif olunan yeni rüsumlar ABŞ-ın 1974-cü il Ticarət Qanununun 301-ci bölməsi çərçivəsində başlanmış araşdırmaların nəticəsi olaraq hazırlanıb. Həmin hüquqi mexanizm Vaşinqtona xarici ölkələrin ticarət siyasətlərini araşdırmaq və ABŞ maraqlarına zidd hesab olunan hallarda cavab tədbirləri görmək səlahiyyəti verir.

İqtisadçılar hesab edirlər ki, yeni tariflərin qüvvəyə minməsi qlobal ticarətdə əlavə gərginlik yarada, beynəlxalq təchizat zəncirlərinə təsir göstərə və ABŞ-ın əsas ticarət tərəfdaşları ilə münasibətlərində yeni mübahisələrə səbəb ola bilər. Eyni zamanda, Tramp administrasiyası bu addımın yerli istehsalçıların maraqlarını qorumağa və ABŞ iqtisadiyyatının rəqabət qabiliyyətini artırmağa xidmət etdiyini vurğulayır.

Poliqon.info